(c)ovid’s metamorphoses
Soinu-artista eta musikari, idazle, zinemagile, argazkilari eta arte bisualetako artisten lan sorta zabal batekin, @ovid’s Metamorphoses proiektuak COVID-19aren pandemia eta haren ondorio sakonak aldaketarako tresna gisa erabiltzen ditu, arte-arloan eta beste edozein arlotan. Praktika artistikoaren hainbat esparrutan zeharreko esperimentazio-jolasa da, eta bildutako lan guztiak transmisioaren eta inspirazioaren ideien inguruan mugitzen dira, abangoardiakoak izateaz batere lotsatzen ez diren adierazpen artistiko bizi eta ausarten corpus erraldoi bat sortuz.
@ovid’s Metamorphoses Bernd Herzogenrathek —Frankfurt am Maineko Goethe Unibertsitateko Amerikako literatura eta kulturako katedradunak— eta Lasse-Marc Riek soinu-artistak abiarazitako proiektua da. Zinemaren, soinu-artearen eta musikaren, idazketaren, arte bisualen eta argazkigintzaren munduetako artisten ekarpenak biltzen ditu, Ovidioren Metamorfosiak obraren oinarrian dagoen ideia —indarkeriaren bidezko metamorfosia eta aurrerapena— hankaz gora jartzeko eta COVID-19aren epidemia mendebaldeko kulturaren oinarri diren mitoen kontrapisu posible gisa definitzeko asmoz. Hemen aurkezten diren lan guztiak zeharkatzen ditu jolasaren ideiak, oinarrizko egintza artistiko gisa. Kutsadurak eta transmisioak mendeetan zehar mendebaldeko kultura definitu duten mitoak atzean uzten dituen praktika artistikoa ahalbidetzen dute.
@ovid’s Metamorphoses bildumak soinu-pieza, film, testu, argazki, marrazki, komiki eta margolan kopuru ikaragarria jasotzen du, bakoitza bere arloko abangoardian ari diren artista ugarik sortuak. Edertasunari eta esanahiari buruzko jolas intertestual batek transmisioan maiz galtzen diren artelanak sortzen ditu, gure kultura zeharkatzen duten definizio estetiko eta moral arruntetatik haratago bizi direnak. Parte hartu duten artista guztiek ideiak eta piezak trukatu dituzte, mitoak lausotuz telefono hautsiaren jolasaren bidez. Kutsaduraren eta informazioaren arteko jokoan, informazio-kateen eta kutsatze-iturrien artean, esanahi berriak hedatzen dira, artista guztiek definitu eta zehaztutako espazioetan.
(c)ovid’s metamorphoses kutxak zazpi CD, film laburrak dituzten bi datu-DVD eta 200 orrialdeko liburu bat, koloretan, testu, argazki, marrazki eta margolanekin, biltzen ditu. Ez musika ez kutxako beste lanik ez dago formatu digitalean eskuragarri.